सोलह सितम्बर पुण्य तिथि माथे खास रिपोर्ट
राजस्थान मालानी रा गौरव ..रानी रूपांदे 
रूपांदे रावल मल्लिनाथ री जोड़ायत हा। मालाणी रा संस्थापक मल्लिनाथ राव सलखा रा बडा बेटा हा। रूपांदे सूं इणां रौ ब्याव हुवण बाबत अैड़ौ कैयौ जावै कै अेकर मल्लिनाथ नै देवी साख्यात दरसण दिया। तद अै देवी सूं वचन मांग्यौ कै आपनै म्हारै घरां आवणौ पड़सी। देवी केयौ के म्हैं थारै ेदस मांय अवतार लेस्यूं, जे थूं म्हनै पिछाण लेसी तो म्हैं थारै घरै आय जासूं। तद मल्लिनाथ बोल्यौ कै म्हैं थांनै किण तरियां पिछाण सकसूं? तद देवी कैयौ के म्हैं करामात दिखावस्यूं, जे उणसूं पिछाण लेसी तौ म्हैं आ जासूं अर की दिनां बाद देवी वाल्हा राजपूत रै घरां अवतार लियौ। जद वै दस बरस री उमर रा हुया, तद मल्लिनाथ आपरै सैनिकां रै साथै वाल्हां राजपूत रै गाम कानी जाय निकल्या। घोड़ां रै दाणा-पाणी सारू सैनिक संजोग सूं वाल्हा राजपूत रै इज खलिहान मांय जाय पूगा। उण बगत उठै वा कन्या ई बैठी ही। सैनिक जाय'र उणसूं बोल्या के बाई, थोड़ौक दान दिरावौ तो घोड़ां नै देवां। तद वा कैयौ के थारा ठाकर आय'र पाहुरौ मांडै तौ सगलां रा पाहुरा भर दिया जासी। तद सैनिक जाय'र मल्लिनाथ नै कैयौ के अेक कन्या खलिहान में बैठी है, उणसूं म्हैं धान रै वास्तै कैयौ तौ वा बोली के थांरा ठाकर आय'र पाहूरौ मांडै तो सगलां रा पाहुरा भर दिया जासी, सो आप पधारौ। तद मल्लिनाथ पाहूरौ लेय'र गया। वा सगला पाहुरा भर दिया। तद मल्लिनाथ नै मालूम हुयौ के आ वा इज शक्ति है। मल्लिनाथ उणरै पिता कनै जाय'र कैयौ के आप म्हनै आ कन्या परणावौ। सेवट घमौ हठ कर'र उणसूं ब्याव कर्यौ अर आपरै घरां लेय आया।
बात करै परब्रह्म री, पैंड देय इक नाय।
रूपां कहै रे भाइयां, किण विध स्याम मिलाय।।
सुख में ब्रह्मज्ञानी रहै, दुख में रैवै रोय।
बाई रूपां यूं कहै, भलौ कदैई न होय।।
अै दूहा कैयोड़ा है रूपांदे रा। राणी हुवती थकी ई रूपांदे आपरी भगती रै प्राम जिकौ जस कमायौ, वौ आज पण आथूणै राजस्थान मांय फैल्योड़ौ है।
रूपांदे रै परणीज्यां सूं पैला अेकर उणरै गाम जैसलमेर रावल रा पुत्र ऊगमसी भाटी पैदल आय रैय हा। वै तिरसा हा अर उणां रै साथै कांबड़िया ई हा। जद उणां रूपांदे नै देख'र उण कनै आया अर पूछ्यौ के बाई, पाणी है कांई? रूपांदे कैयौ के है। तद ऊगमसी बोल्या के आवौ साधुवां, पाणी पीवौ। उण बगत रूपांदे कनै जित्तौ ई पाणी हौ वौ सब रौ सब वै पीयग्या। उण बगत रूपांदे रौ मूंडौ उतरग्यौ। बाप-भाई आवैला तौ कांई पीवैला? आ चिंता उणनै सतावण लागी। तद रूपांदे री अंतस तणौ भाव जाण'र ऊगमसी पाणी पी लेवण रै बाद घड़ा माथै हाथ मेल'र बोल्या के हे साहिब! इणनै पूरौ भरदौ। तद घड़ौ भरग्यौ। औ चमत्कार देख'र रूपांदे ऊगमसी रै पगां पड़गी। ऊगमसी कैयौ के बाई, थूं कंवारी है के परणी? तद वा बोली के कंवारी। तद ऊगमसी रूपांदे रै हाथ मांय तांबै रौ अेक कड़ौ डाल दियौ अर कैयौ के आई दूज नै सात घरां सूं मांग'र जिकी भिक्षा मिलै, वा आं कांबड़िया साधुवां में बांट दीजौ। इम तरै कैय'र अर उणरै मस्तक हाथ राख'र ऊगमसी तो धकै रवानै हुयग्या। रूपांदे ज्यूं कैयौ, त्यूं ई करती रैयी। जद वा राणी ई हुयगी तद ई वा दूज रै दिन सात घर सूं भिक्षा मांग'र, उणरौ खीच बणाय'र कांबड़िया में बांटती।
केई दिनां बाद ऊगमसी मेहवै आया। कांबड़िया पण अेकठ हुया। इत्तै में ऊगमसी कांबड़िया सूं पूछ्यौ के अठै वाल्है री बेटी रूपांदे है, वा कठै? तद वै जबाब दियौ के वा तौ मल्लिनाथ री राणी हुयगी है, पण फेर ई वा कांबड़ियां नै घणौ मानै। तद ऊगमसी कैयौ के जाय'र उणनै खबर करौ के ऊगमसी आयौ है। तद अेक कांबड़ियौ जाय'र खबर दीवी अर कैयौ के बाई, ऊगमसी आया है। रूपांदे कैयौ के सिंझ्या रा किणी तरियां आवूंला। रूपांदे री सौतां मल्लिनाथ रा कान भर दिया। कैयौ के आ ढेढां रै अठै जावै अर आभड़ोछोत फैलावै। तद मल्लिनाथ कैयौ के म्हैं खुद देखूंला तौ साच मानूंला। रात हुई जद रूपांदे कांबल अर लोवड़ी लेय'र ऊगमसी रै कनै जाय'र पगां लागी। तद सौतां मल्लिनाथ सूं कैयौ के उठै जाय'र देखौ, वा ढेढां रै अठै गई परी है। त मल्लिनाथ तरवार लेय'र लारै गया। उठै जाय'र देख्यौ के ऊगमसी बैठ्या है। सामी रूपांदे बैठी है अर कांबड़िया गाय रैया है। मल्लिनाथ औ देख'र आपरै अेक चाकर सूं रूपांदे री जूतियां चुरवाय लीवी। इत्तै में अेक कांबड़ियौ कैयौ कै बाई नै अबै रवानै कर देवणौ चाइजै। बाई रौ इण जगै ठैरणौ ज्यादा अच्छौ नीं है। तद थन रै आगै जिकौ चढ़ावौ हौ, वौ थाली मांय लेय'र रूपांदे नै दियौ अर कैयौ के जा बाई, थारौ भलौ हुवै। रूपांदे आगै जाय'र देखै तौ जूतियां नीं। तद सगला कांबड़िया उठ्या। अठी-उठी जोवण लागा, पण जूतियां मिली कोनी। त ऊगमसी कैयौ के साधुवां! साहिब सूं प्रार्थना करौ के हे साहिब, इणी तरै री जूतियां आय जावै। तद वैड़ी री वैड़ी जूतियां आकास सूं आयगी। रूपांदे पैर'र आपरै घर कानी रवानै हुई।
बीच मांय मल्लिनाथ उणरौ मारग रोक दियौ अर आडा फिरता बोल्या कै कुण है? वा जबाब दियौ कके जी, म्हैं तौ आपरी दासी हूं। मल्लिनाथ कैयौ के कठै गई ही? तद रूपांदे बोली के फूलां सारू गई ही। मल्लिनाथ कैयौ के म्हारी स्त्री हुय'र फूलां सारू जावै, आ कैड़़ी बात है? तद रूपांदे बोली के म्हारी सौतां रै चौ चाकर है जिका लेय आवै, पण म्हारै सारू लावण वाला कोई है नीं। औ जबाब सुण'र मल्लिनाथ कैयौ के देखूं तौ फूल। रूपांदे बोली के फूलां रौ कांई देखणौ! पण मल्लिनाथ कपड़ौ आगौ कर लियौ अर थाली लेयली। थाली मांय देखै तौ भांत-भांत रा फू. वै देख'र इचरज में पड़ग्या क्यूं के उण मांय फूल-फल देख'र मल्लिनाथ उणरै चमत्कार सूं प्रभावित हुया। वै रूपांदे रै पगां पड़ग लागा, पण उणां रा हाथ पकड़ लिया। मल्लिनाथ कैवण लागा के रूपांदे! थूं जिण पंथ में है, उण मांय म्हनै ई दीक्षित करा। रूपांदे बोली के राज, औ पंथ घणौ कठण है। मल्लिनाथ कैयौ के म्हैं अनुसरण करूंला। तद वै दोनूं ऊगमसी कनै गया। रूपांदे कैयौ के राज नै ई पंथ मांय दीक्षित करावौ। तद मल्लिनाथ रै हाथां मांय वैड़ौ ई तांबै रौ कड़ौ घाल'र अेक छड़ी दीवी। पछै कैयौ के दूज रै दिन सात घरां सूं अन्न री भिक्षा मांग'र कांबड़ियां नै बांटजौ। इण भांत रावल मल्लिनाथ ई कांबड़िया बणाईज्या। दूजै दिन सुबै मल्लिनाथ उणां नै आपरै घरां लेयग्या। भोजन-प्रसाद कर्यौ। ऊगमसी नै वै अेक महीनौ राखिया अर सगली ई विद्यावां प्राप्त कर'र उणां नै विदा कर्यौ। इण भांत रावल मल्लिनाथ आपरी जोड़ायत रूपांदे रै पाण नवौ पंथ अपणायौ। तिलवाड़ै रै मल्लिनाथ रै मिंदर री तरै मालाजाल में रूपांदे रौ मिंदर है।
रूपांदे रावल मल्लिनाथ री जोड़ायत हा। मालाणी रा संस्थापक मल्लिनाथ राव सलखा रा बडा बेटा हा। रूपांदे सूं इणां रौ ब्याव हुवण बाबत अैड़ौ कैयौ जावै कै अेकर मल्लिनाथ नै देवी साख्यात दरसण दिया। तद अै देवी सूं वचन मांग्यौ कै आपनै म्हारै घरां आवणौ पड़सी। देवी केयौ के म्हैं थारै ेदस मांय अवतार लेस्यूं, जे थूं म्हनै पिछाण लेसी तो म्हैं थारै घरै आय जासूं। तद मल्लिनाथ बोल्यौ कै म्हैं थांनै किण तरियां पिछाण सकसूं? तद देवी कैयौ के म्हैं करामात दिखावस्यूं, जे उणसूं पिछाण लेसी तौ म्हैं आ जासूं अर की दिनां बाद देवी वाल्हा राजपूत रै घरां अवतार लियौ। जद वै दस बरस री उमर रा हुया, तद मल्लिनाथ आपरै सैनिकां रै साथै वाल्हां राजपूत रै गाम कानी जाय निकल्या। घोड़ां रै दाणा-पाणी सारू सैनिक संजोग सूं वाल्हा राजपूत रै इज खलिहान मांय जाय पूगा। उण बगत उठै वा कन्या ई बैठी ही। सैनिक जाय'र उणसूं बोल्या के बाई, थोड़ौक दान दिरावौ तो घोड़ां नै देवां। तद वा कैयौ के थारा ठाकर आय'र पाहुरौ मांडै तौ सगलां रा पाहुरा भर दिया जासी। तद सैनिक जाय'र मल्लिनाथ नै कैयौ के अेक कन्या खलिहान में बैठी है, उणसूं म्हैं धान रै वास्तै कैयौ तौ वा बोली के थांरा ठाकर आय'र पाहूरौ मांडै तो सगलां रा पाहुरा भर दिया जासी, सो आप पधारौ। तद मल्लिनाथ पाहूरौ लेय'र गया। वा सगला पाहुरा भर दिया। तद मल्लिनाथ नै मालूम हुयौ के आ वा इज शक्ति है। मल्लिनाथ उणरै पिता कनै जाय'र कैयौ के आप म्हनै आ कन्या परणावौ। सेवट घमौ हठ कर'र उणसूं ब्याव कर्यौ अर आपरै घरां लेय आया।
बात करै परब्रह्म री, पैंड देय इक नाय।
रूपां कहै रे भाइयां, किण विध स्याम मिलाय।।
सुख में ब्रह्मज्ञानी रहै, दुख में रैवै रोय।
बाई रूपां यूं कहै, भलौ कदैई न होय।।
अै दूहा कैयोड़ा है रूपांदे रा। राणी हुवती थकी ई रूपांदे आपरी भगती रै प्राम जिकौ जस कमायौ, वौ आज पण आथूणै राजस्थान मांय फैल्योड़ौ है।
रूपांदे रै परणीज्यां सूं पैला अेकर उणरै गाम जैसलमेर रावल रा पुत्र ऊगमसी भाटी पैदल आय रैय हा। वै तिरसा हा अर उणां रै साथै कांबड़िया ई हा। जद उणां रूपांदे नै देख'र उण कनै आया अर पूछ्यौ के बाई, पाणी है कांई? रूपांदे कैयौ के है। तद ऊगमसी बोल्या के आवौ साधुवां, पाणी पीवौ। उण बगत रूपांदे कनै जित्तौ ई पाणी हौ वौ सब रौ सब वै पीयग्या। उण बगत रूपांदे रौ मूंडौ उतरग्यौ। बाप-भाई आवैला तौ कांई पीवैला? आ चिंता उणनै सतावण लागी। तद रूपांदे री अंतस तणौ भाव जाण'र ऊगमसी पाणी पी लेवण रै बाद घड़ा माथै हाथ मेल'र बोल्या के हे साहिब! इणनै पूरौ भरदौ। तद घड़ौ भरग्यौ। औ चमत्कार देख'र रूपांदे ऊगमसी रै पगां पड़गी। ऊगमसी कैयौ के बाई, थूं कंवारी है के परणी? तद वा बोली के कंवारी। तद ऊगमसी रूपांदे रै हाथ मांय तांबै रौ अेक कड़ौ डाल दियौ अर कैयौ के आई दूज नै सात घरां सूं मांग'र जिकी भिक्षा मिलै, वा आं कांबड़िया साधुवां में बांट दीजौ। इम तरै कैय'र अर उणरै मस्तक हाथ राख'र ऊगमसी तो धकै रवानै हुयग्या। रूपांदे ज्यूं कैयौ, त्यूं ई करती रैयी। जद वा राणी ई हुयगी तद ई वा दूज रै दिन सात घर सूं भिक्षा मांग'र, उणरौ खीच बणाय'र कांबड़िया में बांटती।
केई दिनां बाद ऊगमसी मेहवै आया। कांबड़िया पण अेकठ हुया। इत्तै में ऊगमसी कांबड़िया सूं पूछ्यौ के अठै वाल्है री बेटी रूपांदे है, वा कठै? तद वै जबाब दियौ के वा तौ मल्लिनाथ री राणी हुयगी है, पण फेर ई वा कांबड़ियां नै घणौ मानै। तद ऊगमसी कैयौ के जाय'र उणनै खबर करौ के ऊगमसी आयौ है। तद अेक कांबड़ियौ जाय'र खबर दीवी अर कैयौ के बाई, ऊगमसी आया है। रूपांदे कैयौ के सिंझ्या रा किणी तरियां आवूंला। रूपांदे री सौतां मल्लिनाथ रा कान भर दिया। कैयौ के आ ढेढां रै अठै जावै अर आभड़ोछोत फैलावै। तद मल्लिनाथ कैयौ के म्हैं खुद देखूंला तौ साच मानूंला। रात हुई जद रूपांदे कांबल अर लोवड़ी लेय'र ऊगमसी रै कनै जाय'र पगां लागी। तद सौतां मल्लिनाथ सूं कैयौ के उठै जाय'र देखौ, वा ढेढां रै अठै गई परी है। त मल्लिनाथ तरवार लेय'र लारै गया। उठै जाय'र देख्यौ के ऊगमसी बैठ्या है। सामी रूपांदे बैठी है अर कांबड़िया गाय रैया है। मल्लिनाथ औ देख'र आपरै अेक चाकर सूं रूपांदे री जूतियां चुरवाय लीवी। इत्तै में अेक कांबड़ियौ कैयौ कै बाई नै अबै रवानै कर देवणौ चाइजै। बाई रौ इण जगै ठैरणौ ज्यादा अच्छौ नीं है। तद थन रै आगै जिकौ चढ़ावौ हौ, वौ थाली मांय लेय'र रूपांदे नै दियौ अर कैयौ के जा बाई, थारौ भलौ हुवै। रूपांदे आगै जाय'र देखै तौ जूतियां नीं। तद सगला कांबड़िया उठ्या। अठी-उठी जोवण लागा, पण जूतियां मिली कोनी। त ऊगमसी कैयौ के साधुवां! साहिब सूं प्रार्थना करौ के हे साहिब, इणी तरै री जूतियां आय जावै। तद वैड़ी री वैड़ी जूतियां आकास सूं आयगी। रूपांदे पैर'र आपरै घर कानी रवानै हुई।
बीच मांय मल्लिनाथ उणरौ मारग रोक दियौ अर आडा फिरता बोल्या कै कुण है? वा जबाब दियौ कके जी, म्हैं तौ आपरी दासी हूं। मल्लिनाथ कैयौ के कठै गई ही? तद रूपांदे बोली के फूलां सारू गई ही। मल्लिनाथ कैयौ के म्हारी स्त्री हुय'र फूलां सारू जावै, आ कैड़़ी बात है? तद रूपांदे बोली के म्हारी सौतां रै चौ चाकर है जिका लेय आवै, पण म्हारै सारू लावण वाला कोई है नीं। औ जबाब सुण'र मल्लिनाथ कैयौ के देखूं तौ फूल। रूपांदे बोली के फूलां रौ कांई देखणौ! पण मल्लिनाथ कपड़ौ आगौ कर लियौ अर थाली लेयली। थाली मांय देखै तौ भांत-भांत रा फू. वै देख'र इचरज में पड़ग्या क्यूं के उण मांय फूल-फल देख'र मल्लिनाथ उणरै चमत्कार सूं प्रभावित हुया। वै रूपांदे रै पगां पड़ग लागा, पण उणां रा हाथ पकड़ लिया। मल्लिनाथ कैवण लागा के रूपांदे! थूं जिण पंथ में है, उण मांय म्हनै ई दीक्षित करा। रूपांदे बोली के राज, औ पंथ घणौ कठण है। मल्लिनाथ कैयौ के म्हैं अनुसरण करूंला। तद वै दोनूं ऊगमसी कनै गया। रूपांदे कैयौ के राज नै ई पंथ मांय दीक्षित करावौ। तद मल्लिनाथ रै हाथां मांय वैड़ौ ई तांबै रौ कड़ौ घाल'र अेक छड़ी दीवी। पछै कैयौ के दूज रै दिन सात घरां सूं अन्न री भिक्षा मांग'र कांबड़ियां नै बांटजौ। इण भांत रावल मल्लिनाथ ई कांबड़िया बणाईज्या। दूजै दिन सुबै मल्लिनाथ उणां नै आपरै घरां लेयग्या। भोजन-प्रसाद कर्यौ। ऊगमसी नै वै अेक महीनौ राखिया अर सगली ई विद्यावां प्राप्त कर'र उणां नै विदा कर्यौ। इण भांत रावल मल्लिनाथ आपरी जोड़ायत रूपांदे रै पाण नवौ पंथ अपणायौ। तिलवाड़ै रै मल्लिनाथ रै मिंदर री तरै मालाजाल में रूपांदे रौ मिंदर है।
