धरती धोरां री !
धरती धोरां री !
कन्हैयालाल सेठिया (1919-2008)
आ तो सुरगां नै सरमावै
ईं पर देव रमण नै आवै
ईं रो जस नर नारी गावै
धरती धोरां री !
ईं पर देव रमण नै आवै
ईं रो जस नर नारी गावै
धरती धोरां री !
सूरज कण कण नै चमकावै
चन्दो इमरत रस बरसावै
तारा निछरावल कर ज्यावै
धरती धोरां री !
चन्दो इमरत रस बरसावै
तारा निछरावल कर ज्यावै
धरती धोरां री !
काळा बादलिया घहरावै
बिरखा घूघरिया घमकावै
बिजली डरती ओला खावै
धरती धोरां री !
बिरखा घूघरिया घमकावै
बिजली डरती ओला खावै
धरती धोरां री !
लुळ लुळ बाजरियो लैरावै
मक्की झालो दे’र बुलावै
कुदरत दोन्यूं हाथ लुटावै
धरती धोरां री !
मक्की झालो दे’र बुलावै
कुदरत दोन्यूं हाथ लुटावै
धरती धोरां री !
पंछी मधरा मधरा बोलै
मिसरी मीठै सुर स्यूं घोलै
झीणूं बायरियो पंपोळै
धरती धोरां री !
मिसरी मीठै सुर स्यूं घोलै
झीणूं बायरियो पंपोळै
धरती धोरां री !
नारा नागौरी हिद ताता
मदुआ ऊंट अणूंता खाथा !
ईं रै घोड़ां री के बातां ?
धरती धोरां री !
मदुआ ऊंट अणूंता खाथा !
ईं रै घोड़ां री के बातां ?
धरती धोरां री !
ईं रा फल फुलड़ा मन भावण
ईं रै धीणो आंगण आंगण
बाजै सगळां स्यूं बड़ भागण
धरती धोरां री !
ईं रै धीणो आंगण आंगण
बाजै सगळां स्यूं बड़ भागण
धरती धोरां री !
ईं रो चित्तौड़ो गढ़ लूंठो
ओ तो रण वीरां रो खूंटो
ईं रो जोधाणूं नौ कूंटो
धरती धोरां री !
ओ तो रण वीरां रो खूंटो
ईं रो जोधाणूं नौ कूंटो
धरती धोरां री !
आबू आभै रै परवाणै
लूणी गंगाजी ही जाणै
ऊभो जयसलमेर सिंवाणै
धरती धोरां री !
लूणी गंगाजी ही जाणै
ऊभो जयसलमेर सिंवाणै
धरती धोरां री !
ईं रो बीकाणूं गरबीलो
ईं रो अलवर जबर हठीलो
ईं रो अजयमेर भड़कीलो
धरती धोरां री !
ईं रो अलवर जबर हठीलो
ईं रो अजयमेर भड़कीलो
धरती धोरां री !
जैपर नगरयां में पटराणी,
कोटा बूंटी कद अणजाणी ?
चम्बल कैवै आं री का’णी
धरती धोरां री !
कोटा बूंटी कद अणजाणी ?
चम्बल कैवै आं री का’णी
धरती धोरां री !
कोनी नांव भरतपुर छोटो
घूम्यो सुरजमल रो घोटो
खाई मात फिरंगी मोटो
धरती धोरां री !
घूम्यो सुरजमल रो घोटो
खाई मात फिरंगी मोटो
धरती धोरां री !
ईं स्यूं नहीं माळवो न्यारो
मोबी हरियाणो है प्यारो
मिलतो तीन्यां रो उणियारो
धरती धोरां री !
मोबी हरियाणो है प्यारो
मिलतो तीन्यां रो उणियारो
धरती धोरां री !
ईडर पालनपुर है ईं रा
सागी जामण जाया बीरा
ऐ तो टुकड़ा मरू रै जी रा
धरती धोरां री !
सागी जामण जाया बीरा
ऐ तो टुकड़ा मरू रै जी रा
धरती धोरां री !
सोरठ बंध्यो सोरठां लारै
भेळप सिंध आप हंकारै
मूमल बिसरयो हेत चितारै
धरती धोरां री !
भेळप सिंध आप हंकारै
मूमल बिसरयो हेत चितारै
धरती धोरां री !
ईं पर तनड़ो मनड़ो वारां
ईं पर जीवण प्राण उवारां
ईं री धजा उडै गिगनारां
धरती धोरां री !
ईं पर जीवण प्राण उवारां
ईं री धजा उडै गिगनारां
धरती धोरां री !
ईं नै मोत्यां थाल बधावां
ईं री धूल लिलाड़ लगावां
ईं रो मोटो भाग सरावां
धरती धोरां री !
ईं री धूल लिलाड़ लगावां
ईं रो मोटो भाग सरावां
धरती धोरां री !
ईं रै सत री आण निभावां
ईं रै पत नै नहीं लजावां
ईं नै माथो भेंट चढ़ावां
मायड़ कोड़ां री
धरती धोरां री !
ईं रै पत नै नहीं लजावां
ईं नै माथो भेंट चढ़ावां
मायड़ कोड़ां री
धरती धोरां री !
*****
